VOV4.K’ho- Ngai 12/04, Củ tịc lơgar ồng Nguyễn Xuân Phúc tus bal Pơrjum hòi jà bơcri priă tàm bàr kơnhoàl: Hóc Môn mờ Củ Chi, ƀòn dờng Hồ Chí Minh. Do là pơrjum hòi jà bơcri priă dờng ngan rlau jơh lơgar hê dê bal mờ bơta tus bal bơh 550 nă cau ala măt dê, mìng là mpồl lơh sa kă bro. Tàm pơrjum, bàr kơnhoàl Củ Chi mờ Hóc Môn neh yal tơngĭt ală bơta pràn bơtàu tơnguh, ală bơta ƀươn geh is mờ hòi jà bơcri priă tàm 55 rơndăp broă lơh bal mờ kờp jơh priă là rlau 285 rbô tơmàn đong tàm ală gah broă lơh gùng lòt, lơh bơka wơl tiah drà, lơh sa mờ măy mok, lơh broă sa sươn sre, kă bro, drơng broă.

Uă cau bơcri priă geh jàu sră cơng tàng bơcri priă tơn tàm dơ̆ pơrjum

Đơs tàm Pơrjum, jờng rơ ală mpồl lơh sa kă bro hơ bơcri priă tàm Củ Chi mờ Hóc Môn, Củ tịc lơgar ồng Nguyễn Xuân Phúc đơs sùm, do là ală tiah geh uă bơta ƀươn bơtàu tơnguh, tiah ơm tàm gùl rềp nhàr bal mờ Long An, Bình Dương, geh tơl pràn tàm tơrbŏ bal gùng lòt tàm dà mờ gùng lòt tus dà dờng Sài Gòn. Củ tịc lơgar ồng Nguyễn Xuân Phúc sồr ală cau bơcri priă bơr đơs gơ lòt jăt bal mờ lơh, mhar lam lơh rơndăp broă lơh mờ đơs ờ mờ jơnau ờ niam, sa kwề sa kwà. Bal mờ hơ̆ là hơ sền gàr tiah ơm kis, kơnòl mờ dà lơgar mờ kơnòl mờ mpồl bơtiàn, pơgồp bơnah prăp gàr mờ ngui niam bơta kwơ niam chài.

Cau mblàng Lơ Mu K’Yến