VOV4.K’ho- Di tơngkah kir sơnrai 75 nam Ngai Cau ling sồt să- Cau ling chơ̆t màng (27/07/1947- 27/07/2022), drim ngai 26/07, Củ tịc lơgar ồng Nguyễn Xuân Phúc neh tus bal Pơrjum jờng rơ cau geh màng mờ Kăc màng pơnrơ ngan tàm Kwang àng làng bol tơngai bơh nam 2017- 2022. Tus bal pơrjum do geh 461 nă cau ala măt ai gĭt nđờ rbô nă cau ling sồt să, cau pròc mhàm cau ling chơ̆t màng mờ cau geh màng mờ kăc màng neh mờ gam lơh broă tàm Kwang àng làng bol bơh ală tŭ tơngai.

Đơs tàm pơrjum, Củ tịc lơgar ồng Nguyễn Xuân Phúc pơyua tus ală kwang bàng lơh broă Kwang àng dờng sơnam, ală Cau khin cha jak chài mpồl ling phàu crong làng bol, Cau khin cha jak chài lơh broă, ală oh mi là cau ling sồt să, cau ling kòp tê jê să, ală cau pròc mhàm cau ling chơ̆t màng, cau geh màng mờ kăc màng, ală mpồl cau, cau dùl nă să is geh cồng nha jak ngan tàm broă lơh kis gĭt jơnau gĭt adat, kah rơngal wơl bal mờ jơh gùt kwang bàng, cau ling tàm mpồl kwang àng làng bol jơnau còp să đềt mềr, ală nùs nhơm jrô ơnàng ngan mờ bơta gĭt ưn ngài uă ngan rlau jơh.

Củ tịc lơgar đơs loh, Đảng, Dà lơgar mờ Làng bol he geh sùm sùm jơh rài kah ưn ngài ală cau khin cha jak chài, Cau ling chơ̆t màng, cau ling sồt să, cau geh màng mờ dà lơgar, ală cau ling neh phi să tài broă lơh dong klàs jơi bơtiàn, bơ̆t bơtàu mờ sền gàr Dà lơgar, sền gàr rài kis ring lơngai, lơngai lơngò ai làng bol in.

Cau mblàng Lơ Mu K’Yến