VOV4.K’ho - Tàm nùs nhơm ală ngai bồ nam pa Ñâm Zần, tơnkah 92 nam ngai crơng gơs Đảng, Củ tịc lơgar ồng Nguyễn Xuân Phúc tus mờ geh jơnau đơs tàm pơrjum Ngai chờ “Rùp să bồ sơnam pa tàm ală tiah gùt lơgar” nam 2022.

Đơs tàm pơrjum Ngai chờ, Củ tịc lơgar ồng Nguyễn Xuân Phúc đơs wơl jơnau nting bơh Củ tịc lơgar Hồ Chí Minh: “Làng bol Yoan ha là Thổ, Mường ha là Mán, Jrai ha là Rơđê, Sơdang ha là Bơnhàr mờ ală jơi bơtiàn kòn cau ndai, ndrờm là oh kòn, kòn sao lơgar Việt Nam dê, ndrờm là oh mi pròc mhàm tờm. He kis chơ̆t geh bal, chờ hờp, glar bòl tus bal, hờm ram jơgloh bơsàp dong kờl bal” mờ đơs tai: Bơta jăk chài dờng màng bơh jơi bơtiàn dà lơgar Việt Nam geh ai gơs tài bơh 54 jơi bơtiàn kòn cau tam klăc bal, đềt mềr bal. Hơ̆ là dùl jơtài uă bơta, li la, geh broă ring bal uă bè jơnau đơs, akhar cih, là phan bơna kwơ màng bơh dà lơgar dê. Git jơnau mờ dùl jơi bơtiàn, lài jơh là git jơnau tus mờ bơta chài rơgơi bơh jơi bơtiàn hơ̆. Broă lơh kòn cau bơh Đảng neh ai geh tơl ală bơta tus mờ broă prăp gàr mờ tơnguh bơtàu nùs nhơm krơi is tàm bơta niam chài rơgơi bơh tơl jơi bơtiàn kòn cau dê, mờ lơh bơta chài rơgơi bơh ală kòn cau geh tơrgùm bal mờ lơh gơs bơta niam chài rơgơi Việt Nam kơl jăp mờ àng gơcrà.

Cau mblàng Ndong Brawl