Gờm chờ ồng Kim Sang-Hwan, Ƀộ trưởng Ƀộ atbồ Anih cah rơña dà lơgar, Anih cah rơña jơnhua ngan rlau jơh dà lơgar Hàn Quôk mờ Mpồl kwang bàng kâp dờng lòt còp lơgar Việt Nam di tàm tŭ 2 lơgar tơngkah 30 nam ngai lơh git gơp cribơyai broă mờ lơgar ndai, Củ tịc lơgar yal wơl bơta kơlôi sơnơng niam ngan bè dơ̆ lòt còp kâp dà lơgar tus lơgar Hàn Quôk pa do, ưn ngài bơta wă rò yŭ rơyùm, jơh nùs bơh Kwang atbồ lơgar Hàn Quôk ồng Yoon Suk-yeol dê mờ kwang đơng lam bồ kâp dờng lơgar Hàn Quôk. Củ tịc lơgar pin dờn mờ bơta git gơp lơh broă bal jŏ jòng tơl làm đah 2 lơgar, Anih cah rơña jơnhua ngan rlau jơh 2 lơgar geh pơgồp bal jơh nùs, geh cồng nha rlau tai, tă pơgồp lơh gơlik ngan ngồn bơta git gơp do.

Ƀộ trưởng Ƀộ atbồ Anih cah rơña dà lơgar, Anih cah rơña jơnhua ngan rlau jơh dà lơgar Hàn Quôk ồng Kim Sang-Hwan jơh nùs ưn ngài Củ tịc lơgar ồng Nguyễn Xuân Phúc lời tŭ tơngai nàng wă mờ ưn ngài tŭ dờp geh bơta wă rò jơh nùs bơh đah Anih cah rơña jơnhua ngan rlau jơh lơgar Việt Nam. Ồng kung tam pà bơta chờ hờp tŭ 2 lơgar neh tơnguh bơta git gơp gơs “Lơgar lơh broă bal jŏ jòng tơl làm”, Ƀộ trưởng đơs là, do là bơnàng jă, là bơta pràn chul chồl nàng 2 anih cah rơña jơnhua ngan rlau jơh 2 lơgar geh tàm tơrbŏ tai ală broă lơh lơh broă bal pràn rlau tai tàm tơngai tus.