VOV4.K’ho- Mho ngai 01/08, tàm Hìu duh broă Củ tịc, Củ tịc lơgar ồng Nguyễn Xuân Phúc neh wă rò còp să Ƀộ trưởng Ƀộ Ngoại giao lơgar Hy Lạp ồng Nikolaos Dendias di dơ̆ lòt còp ngan ngồn Việt Nam. Củ tịc lơgar ồng Nguyễn Xuân Phúc jờng rơ dơ̆ lòt còp lơgar Việt Nam bơh sơnrờp bơh ồng Dendias dê tàm gơnoar broă Ƀộ trưởng Ƀộ Ngoại giao lơgar Hy Lạp; mơkung pin dờn dơ̆ lòt còp geh pơgồp bơnah kwơmàng tàm broă sơlơ tơnguh bơta gĭt gơ̆p lơh bơyô bal, ờs mờng bơh yau niam bơnĕ đah Việt Nam mờ Hy Lạp.

Củ tịc lơgar kung tơlik nùs nhơm ưn ngài lơgar Hy Lạp neh dong kờl 50 rbô euro mờ Hy Lạp lời ai Ủy ƀan Olympic Dà lơgar Việt Nam in mờ 250 rbô ding vaccine kòp Kovid-19 tàm dơ̆ lồi nam 2021. Củ tịc lơgar pà gĭt, Việt Nam sùm prăp gàr ală nùs nhơm niam bơnĕ bal mờ bơta dong kờl kwơmàng bơh Hy Lạp dê lời ai lơgar Việt Nam in tàm rài tam lơh jòi geh bơta lơngăp lơngai is jơi bơtiàn in, tơrgùm dùl dà lơgar kung bè tàm broă lơh bơ̆t bơtàu mờ bơtàu tơnguh dà lơgar ngai do.

Cau mblàng Lơ Mu K’Yến