VOV4.K’ho- Mho ngai 08/6, tàm Hìu lơh broă Củ tịc, Củ tịc lơgar ồng Nguyễn Xuân Phúc wă Ƀộ trưởng Ƀộ Quốk phòng lơgar Ấn Độ ồng Rajnath Singh gam còp ngan ngồn lơgar Việt Nam.

Củ tịc lơgar ồng Nguyễn Xuân Phúc wă Ƀộ trưởng Ƀộ Quôk phòng Ấn Độ

Tàm dơ̆ wă, Củ tịc lơgar ồng Nguyễn Xuân Phúc chờ hờp sền gŏ bơta gĭt gơ̆p sền gàr dà lơgar đah 2 gah pơn jat tai bơtàu tơnguh uă ngan, lơh broă bal ngan ngồn, geh cồng nha, pơgồp bơnah kwơ màng tàm bơta gĭt gơ̆p 2 gah đah 2 lơgar dê. Ring bal mờ jơnau đơs bơh Ƀộ trưởng ồng Rajnath Singh dê đơs, Củ tịc lơgar ồng Nguyễn Xuân Phúc đơs loh, lơh broă bal sền gàr dà lơgar geh sền là dùl broă tờm lơh broă bal 2 gah Việt Nam mờ Ấn Độ dê. Tàm tơngai ală bơta tàm dunia mờ tàm tiah do gơlik geh kal ke bè tŭ do, Củ tịc lơgar jờng rơ uă Ƀộ Quốk phòng 2 lơgar pơn jat tai sơlơ tơnguh bơt bơtàu kơ̆ kơl jap nùs nhơm pin dờn cíñ trị, lam lơh jat tơl làm, geh cồng nha, ngan ngồn ală sră nggal lơh broă bal neh kĭ, jờng rơ 2 Ƀộ Quốk phòng 2 lơgar dê kĭ Jơnau yal bơr bal Sền sơnơng bal bè gĭt gơ̆p lơh broă bal sền gàr dà lơgar Việt Nam mờ Ấn Độ tus nam 2030.

Cau mblàng K’Hạnh