VOV4.K’ho- Mho ngai 17/06, tàm Hìu duh broă Củ tịc, Củ tịc lơgar ồng Nguyễn Xuân Phúc wă rò mò Khemmani Pholsena, Ủy viên Đảng Dà lơgar, Ƀộ trưởng, Kwang ătbồ Cơldŭ lơh broă Củ tịc lơgar Lào. Củ tịc lơgar gờm chờ mờ đơs niam ngan ală cồng nha kwơmàng mờ tơl làm mờ làng bol lơgar Lào oh mi neh lơh geh tàm tơngai pa do.

Jăt Củ tịc lơgar ồng Nguyên Xuân Phúc đơs, bàr Cơldŭ lơh broă Củ tịc lơgar pal sơlơ tơnguh tai lơh broă bal, tam pà bal mờ uă tơngume, broă lơh geh kwơ ngan, loh làng ngan nàng tơnguh uă bơta niam tơrgùm bal, tă pơgồp jơnau đơs ai Củ tịc lơgar, Phó Củ tịc lơgar in, pơgồp bơnah lơh jăt geh cồng nha gùng dà, jơnau sồr mờ broă lơh kơrnoăt boh lam bơh bàr Đảng, bàr Dà lơgar dê. Bàr Cơldŭ lơh broă Củ tịc lơgar pal lơh pràn ngui kông nghệ sồ nàng lơh niam broă lơh dong broă tă pơgồp jơnau đơs mờ yal tơngĭt jơnau mblàng yal broă lơh bơh Củ tịc lơgar, Phó Củ tịc lơgar dê, lơh niam rlau tai broă lơh wă rò năc mờ dong broă drơng kwang ătbồ lơgar mờ kwang đơng lam bồ kâp dờng in.

Cau mblàng Lơ Mu K’Yến