VOV4.K’ho - Mho òr (10/08), tàm gơlang Củ tịc, Củ tịc lơgar ồng Nguyễn Xuân Phúc neh wă Đại sứ lơgar Kuwait, ồng Yousef Ashour Al-sabbagh mờ Đại sứ lơgar Israel ồng Yaron Mayer tus jào sră dà lơgar pơyoa.

                                 Củ tịc lơgar ồng Nguyễn Xuân Phúc wă Đại sứ lơgar Kuwait

Wă Đại sứ lơgar Kuwait, ồng Yousef Ashour Al-sabbagh, Củ tịc lơgar ồng Nguyễn Xuân Phúc pin dờn Đại sứ geh tơngai lơh broă geh cồng nha, pơgồp bal tàm broă chồl pràn rơlao tai bơta git gơ̆p đah bàr lơgar. Lơgar Việt Nam sùm sền kwơ bơta git gơ̆p mờ lơgar Kuwait, dùl tàm ală lơgar geh broă lơh sa lài ngan lơgar Việt Nam dê tàm Trung Đông. Wă Đại sứ lơgar Israel ồng Yaron Mayer, Củ tịc lơgar sồr Đại sứ pơn jăt tai pơgồp bal chồl pràn broă lơh git gơ̆p đah bàr lơgar, tàm hơ̆ gờñ tơrbŏ wơl broă tam gơl mpồl kwang bàng mờ ală mpồl lơh broă bal đah bàr lơgar, tàm hơ̆ uă ngan là pơrjum dơ̆ 3 Ủy ƀan bàr Cíñ phủ Việt Nam mờ Israel. Bàr lơgar pal tơnguh broă pơgồp bal mờ kờñ bal tàm ală pơrjum cri bơyai dunia, bơyai lơh uă broă lơh mùl màl di tơnkah 30 nam crơng gơs broă lơh bal (1993 - 2023) nàng tơnguh bơta git gơ̆p đah bàr lơgar.

Cau mblàng Ndong Brawl