VOV4.K’ho - Tàm gơlang Củ tịc, Củ tịc lơgar ồng Nguyễn Xuân Phúc pa wă Đại sứ lơgar Ukraine, ồng Gaman Oleksandr mờ Đại sứ lơgar Canada ồng Shawn Perry Steil jào sră dà lơgar.

                          Đại sứ lơgar Ukraine, ồng Gaman Oleksandr jào sră dà lơgar pơyoa

Củ tịc lơgar ồng Nguyễn Xuân Phúc đơs tờm, lơgar Việt Nam sùm sền kwơ broă lơh git gơ̆p, lơh bơyô bal ờs mờng, lơh broă bal tơl ală bơta mờ lơgar Ukraine. Đại sứ lơgar Ukraine neh ưn ngài Củ tịc lơgar ồng Nguyễn Xuân Phúc ai tơngai wă mờ tơlik nùs nhơm ưn ngài lơgar Việt Nam neh kờñ bal mờ tus bal dong kờl, dong kờl kòn bơnus ai làng bol lơgar Ukraine in. Tàm tơngai tus, Đại sứ geh ai uă ngan tơngai lòt còp ală tiah tàm lơgar Việt Nam nàng chồl pràn rơlao tai broă lơh git gơ̆p đah bàr lơgar tàm uă gah broă.

Wă Đại sứ lơgar Canada tàm lơgar Việt Nam, Củ tịc lơgar đơs tờm, lơgar Việt Nam mờ lơgar Canada geh broă lơh git gơ̆p, lơh broă bal niam bơnĕ, tơnguh bơtàu tàm uă gah broă. Bŭ lah kal ke tài bơh kòp Kovid-19, broă lơh git gơ̆p bè cíñ trị, lơh broă bal mờ lơgar ndai đah bàr lơgar gam geh sùm. Đại sứ lơgar Canada đơs, tàm tơngai lơh broă ồng dê, geh lơh ngan jơh pràn nàng chồl pràn rơlao tai broă lơh git gơ̆p đah bàr lơgar.

Cau mblàng Ndong Brawl