VOV4.K’ho- Drim ngai 23/02, tàm gơlăng Củ tịc, Củ tịc lơgar ồng Nguyễn Xuân Phúc wă Kwang ala mat bơh Kwang atbồ lơgar Mỹ dê bè tam gơl trồ tiah ồng John Kerry. Đơs niam ồng John Kerry bè broă lơh ngan tơnguh lơh broă bal 2 lơgar tàm tơngai lài, tàm hơ̆ geh rơcang sơndră mờ tam gơl trồ tiah, Củ tịc lơgar sồr ồng John Kerry chul chồl Cíñ phủ Mỹ pơn jat tai dong kờl Việt Nam tàm gah kuơmàng do. Củ tịc lơgar kung jờng rơ cồng nha kuơmàng bơh ală dơ̆ lòt còp Việt Nam bơh kwang đơng lam bồ lơgar Mỹ dê, pơn rơ ngan là dơ̆ lòt còp bơh Phó Kwang atbồ lơgar Mỹ mò Kamala Harris dê, tơnguh git gơp lơh broă bal tơl làm đah 2 lơgar.

Ưn ngài Củ tịc lơgar neh lời tŭ tơngai nàng wă, ồng John Kerry đơs là, tàm bơta bơtàu tơnguh niam bơnĕ, git gơp lơh broă bal tơl làm đah Việt Nam mờ Mỹ ngai sơlơ bơtàu tơnguh, ngan ngồn mờ geh cồng nha. Cribơyai bè bơta geh ngan dà lềng ngai sơlơ gơguh tih mờ gơ rềng uă ngan tus tiah ring dà dờng Cửu Long mờ ală tiah thòng bơh lơgar Việt Nam dê, ồng John Kerry pà git, Mỹ gơtùi dong kờl Việt Nam tàm bơta tam gơl trồ tiah, tam gơl năng lượng gơs broă lơh năng lượng sàng goh, ngan là năng lượng mat tơngai. Bơdìh hơ̆ tai, Mỹ kung gơtùi dong kờl Việt Nam lam lơh tam gơl sồ, drơng bơtàu tơnguh lơh sa- mpồl bơtiàn.

Cau mblàng K’Duẩn