VOV4.K’ho- Ngai 04/8, tàm Hìu lơh broă Củ tịc, Củ tịc lơgar ồng Nguyễn Xuân Phúc wă Kwang atbồ càr Gunma, lơgar Nhờk ồng Yamamoto Ichita lòt còp mờ lơh broă tàm lơgar Việt Nam. Củ tịc lơgar ồng Nguyễn Xuân Phúc chờ hờp pà git, ồng Yamamoto Ichita là Kwang atbồ càr sơn rờp ngan bơh Nhờk dê lòt còp Việt Nam tơnơ̆ kòp Kovid-19, sơn đờm lam lơh wơl broă tìp mat, lơh kwèng ală càr, ƀòn dờng đah 2 lơgar mờ wèt tus tơngkah kir sơnrai 50 nam ngai lơh git gơp lơh broă đah Việt Nam mờ Nhờk tàm nam 2023.

Củ tịc lơgar ồng Nguyễn Xuân Phúc wă Kwang atbồ càr Gunma, lơgar Nhờk

Củ tịc lơgar đơs loh, tŭ do Nhờk pơn jat tai là lơgar lơh broă bal lơh sa khà dùl bơh Việt Nam dê, là lơgar ai priă dong kờl ODA sồ 1, là lơgar bơcri priă dờng kuơmàng dơ̆ 3 mờ lơgar lơh broă bal kă bro dơ̆ 4 bơh Việt Nam dê. Củ tịc lơgar đơs niam broă lơh ngan bơh ồng Yamamoto Ichita dê tàm broă tơnguh git gơp mờ Việt Nam tàm tơngai lài; ngan là broă pơgồp bal bơyai lơh sa tềp Việt Nam mờ dong kờl mpồl bơtiàn cau Việt Nam tàm càr sơrlèt gan kal ke tài bơh kòp Kovid-19.

Cau mblàng K’Duẩn