Đơs tàm dơ̆ wă, Củ tịc lơgar đơs nền, Đảng, Dà lơgar mờ làng bol Việt Nam sùm sền dờng màng, cih kah bơta kờñ, tam klăc pràn kơl dang mờ dong kờl kwơ màng bơh ală mpồl làng bol lơh tờm, gơguh jak dunia dê tàm hơ̆ geh Mpồl duh broă ring lơngai dunia mờ ală lơgar tàm mpồl gơwèt mờ tơngai lơgar Việt Nam tam lơh ai geh lơngap lơngai is jơi bơtiàn lài do dê, kung bè tàm dơ̆ bơt bơtàu mờ sền gàr dà lơgar tŭ do dê.

Đơs tus jơnau kờñ gơ gơs dùl lơgar gam bơtàu tơnguh geh lơh sa mờ măy mok pa, priă lơh geh dimơ mờ uă tàm nam 2030 mờ gơ gơs là lơgar bơtàu tơnguh, priă lơh geh uă tàm nam 2045, Củ tịc lơgar ồng Nguyễn Xuân Phúc pà gĭt, nàng lơh geh jơnau kờñ geh ai, Đảng, Dà lơgar mờ làng bol Việt Nam tơrgùm lơh niam bơta pràn tàm lơgar bơh jơh gùt jơi bơtiàn dê, là bơta tờm lơh nền bal mờ rcang mŭt gơ rờm bal, ai bơta pràn dunia là kwơ màng, gàr kơ̆ tiah ring lơngai, kơ̆ kơljap ai bơtàu tơnguh dà lơgar pas gơs, làng bol kis chờ hờp.