VOV4.K’ho- Mho ngai 09/03, tàm Hìu duh broă Củ tịc, Củ tịc lơgar ồng Nguyễn Xuân Phúc neh wă rò ală Đại sứ ală lơgar: Sierra Leone, Nepal, Guatemala, Maldives, Dominicana jun sră Dà lơgar pơyua. Wă rò Đại sứ Kộng hoà Sierra Leone, Củ tịc lơgar đơs nền, Việt Nam sùm sền dờng màng mờ kơ̆p kờñ lơh tơnguh bơta gĭt gơ̆p lơh broă bal mờ Sierra Leone tàm jơh ală broă: Cíñ trị, lơh broă mờ lơgar ndai, lơh broă sa sươn sre, jak chài măy mok, kă bro.

Bal mờ hơ̆ là sơlơ lơh broă bal đah bàr lơgar gơwèt mờ ală broă uă lơgar, tàm kơnhoàl ù tiah do mờ tàm dunia; kwơmàng là rơcăng lài mờ gàr niam ngan rlau jơh ai ală dơ̆ tàm pơgơl mpồl kwang bàng kâp dờng lòt còp bal mờ gơ̆p đah bàr gah. Wă rò Đại sứ Kộng Dân củ lơgar Nepal, Củ tịc lơgar ồng Nguyễn Xuân Phúc đơs sùm, Việt Nam sùm sền dờng màng bơta gĭt gơ̆p lơh broă bal mờ Nepal. Củ tịc lơgar pin dờn Đại sứ geh pơn jăt tai lơh jơh pràn he dê tă pơgồp tàm cồng nha lơh geh tàm lơh broă bal đah bàr lơgar. Wă rò Đại sứ Kộng hoà Guatemala, Củ tịc lơgar đơs nền, ală ƀộ, gah lơh broă mờ anih lơh broă bơh lơgar Việt Nam dê geh ai tơl bơta ƀươn nàng Đại sứ in lơh gơs kơnòl broă bal mờ jơnau kờñ lơh tơnguh jơh ală bơta gĭt gơ̆p tam klăc lơh broă bal đah Việt Nam mờ Guatemala.

Cau mblàng Lơ Mu K’Yến