VOV4.K’ho- Mho ngai 17/08, tàm Hìu duh broă Củ tịc dê, Củ tịc lơgar ồng Nguyễn Xuân Phúc neh wă rò Thủ tướng lơgar Israel lài do ồng Ehud Barak gam geh dơ̆ lòt còp mờ lơh broă tàm Việt Nam. Củ tịc lơgar ồng Nguyễn Xuân Phúc jờng rơ ồng Ehud Barak mờ pơ ùr lòt còp lơgar Việt Nam mờ pà gĭt, Việt Nam kơ̆p kờñ lơh broă bal mờ lơgar Israel tàm ală gah broă mờ lơgar do geh bơta pràn bè tam gơl pa bơceh lơh, jak chài măy mok, năng lượng lơh gơlik geh wơl.

Tơngai tus, Củ tịc lơgar ồng Nguyễn Xuân Phúc sồr bàr gah sùm lơh sùm ală broă lơh tìp măt lòt còp bal mờ gơ̆p đah kwang bàng kâp dờng, tàm dong kờl bal mờ gơ̆p tàm ală dơ̆ cribơyai, pơrjum mờ mpồl dunia. Củ tịc lơgar kơ̆p kờñ mờ gơnoar broă mờ bơngă bơh he dê, Thủ tướng lơgar Israel lài do ồng Ehud Barak pơn jăt tai tă pơgồp dong kờl lơh tơnguh rlau tai bơta gĭt gơ̆p lơh bơyô bal niam bơnĕ đah 2 lơgar, kwơmàng tàm broă tam pà bal bơta mờng chài lơh broă lơh dong kờl sơnđờm mŭt lơh broă, dong kờl bơtàu tơnguh jak chài măy mok, tam gơl pa bơceh lơh, bơto bơtê tề lam ală cau kơnòm să geh broă lơh jak.

Cau mblàng Lơ Mu K’Yến