Dờp jơnau jà bơh Tổng Ƀí thư ồng Nguyễn Phú Trọng, Kwang atbồ lơgar Nga ồng Vladimir Putin còp kấp dà lơgar tus lơgar Việt Nam. Ngai òr (20/06), Dơ̆ wă rò Kwang atbồ lơgar Nga ồng Vladimir Putin geh bơyai lơh yŭ rơyùm tàm Gơlang Củ tịc jăt broă lơh ai kwang đơng lam dà lơgar dê, Củ tịc lơgar ồng Tô Lâm đơng lam dơ̆ wă rò.

Tơnơ̆ dơ̆ wă rò, Củ tịc lơgar ồng Tô Lâm mờ Kwang atbồ lơgar Nga ồng Vladimir Putin lam bồ mpồl kwang bàng kấp dờng bàr lơgar bơyai lơh cri bơyai. Nam 2024, lơgar Việt Nam mờ lơgar Nga tơnkah 30 nam kĭ hơ bal Jơnau hơ bal bè ală jơnau tờm bơh bơta git gơ̆p lơh bơyô bal mờ 12 nam crơng gơs bơta git gơ̆p Tam klăc bal jŏ jòng tơl ală bơta. Nam 2025 kung là dùl nam geh kwơ màng ngan tŭ lơgar Việt Nam mờ lơgar Nga tơnkah 75 nam crơng gơs bơta git gơ̆p cri bơyai bal broă lơh bal mờ lơgar ndai. Do là ală tŭ kwơ màng nàng bàr lơgar geh sền wơl, pơn jờng ală cồng nha lơh broă bal neh geh tàm lài do, mờ bơ̆t bơtàu gùng dà broă lơh bal, tơrbŏ bal nàng bơtàu tơnguh bal tơnơ̆ do.Dơ̆ tus còp bơh Kwang atbồ lơgar Nga ồng Putin dơ̆ do ai tơngŏ dùl broă lơh broă bal mờ lơgar ndai kwơ màng bơh bàr lơgar, pơgồp bal kwơ màng lơh nền nòn rơlao tai bơta git gơ̆p Tam klăc bal jŏ jòng tơl ală bơta đah bàr lơgar, pơgồp bal ai bơta ring lơngai, lơh broă bal mờ bơtàu tơnguh tàm tiah do mờ tàm dunia.