Dờp jơnau jà bơh Củ tịc lơgar ồng Tô Lâm, Kwang atbồ lơgar Kộng hòa Zân củ Timor Leste ồng José Ramos-Horta neh tus càr lơgar Hà Nội, sơnđờm dơ̆ lòt còp kấp Dà lơgar tus lơgar Việt Nam bơh ngai 31 nhai 07 tus ngai 3 nhai 08 nam 2024. Drim ngai 1/08, tàm Hìu lơh broă Củ tịc, Củ tịc lơgar ồng Tô Lâm neh đơng lam dơ̆ wă rò ngan ngồn Kwang atbồ lơgar Kộng hoà Zân củ Timor Leste còp kấp Dà lơgar tus lơgar Việt Nam.

Dơ̆ lòt còp kấp Dà lơgar tus lơgar Việt Nam bơh Kwang atbồ lơgar Timor Leste dê geh gơtha kwơ màng ngan pơgồp bơnah bơt bơtàu bơta pin dờn cíñ trị, mơkung là dơ̆ nàng 2 gah in pơn jat tai cribơyai bè ală broă lơh sơlơ tơnguh tai lơh broă bal, lơh jrô ơnàng làm uă rlau tai bơta gĭt gơ̆p đah 2 gah, bơh hơ̆ sơlơ bơrkuăt kơ̆ bơta gĭt gơ̆p lơh bơyô bal bơh yau neh geh bơt bơtàu tàm ală tơngai pa do. Tơnơ̆ dơ̆ wă rò, 2 nă kwang đơng lam bồ lam bồ Mpồl kwang bàng kấp dờng 2 lơgar lơh dơ̆ cribơyai, sền wơl cồng nha lơh broă bal đah 2 dà lơgar dê tàm tơngai pa do mờ đơs ală broă lơh lơh broă bal tàm tơngai tus. Bàr nă kwang đơng lam bồ sền bal dơ̆ kĭ hơ mờ tàm jàu ală sră nggal lơh broă bal đah 2 lơgar dê.