Ngai òr (11/06), tàm Hà Nội, Đảng ủy Kwang àng Dà lơgar, Ƀộ Kwang àng bơyai lơh Pơrjum tàm jào broă lơh jăt gơnoar broă, kơnòl broă bơh Ƀộ trưởng Ƀộ Kwang àng dê đah Đại tướng ồng Tô Lâm, Kwang geh jơng tàm Ƀộ Cíñ trị, Củ tịc lơgar Kộng hoà xã hội củ nghĩa Việt Nam mờ Thượng tướng ồng Lương Tam Quang, Kwang geh jơng tàm Đảng Dà lơgar, Ƀộ trưởng Ƀộ Kwang àng.

Đơs tàm pơrjum, Củ tịc lơgar ồng Tô Lâm gờm chờ Thượng tướng ồng Lương Tam Quang geh pồ at gơnoar broă Ƀộ trưởng Ƀộ Kwang àng; đơs nền, bơta do ai tơngŏ nùs nhơm pin dờn, sền gròi bơh Đảng, Dà lơgar bal mờ Làng bol dê gơwèt mờ mpồl Kwang àng làng bol, bơta dờp, đơs niam ală tă pơgồp, lơh broă jơh nùs bơh Thượng tướng ồng Lương Tam Quang dê tàm gah broă geh jào drơng lơh tàm ală nam do. Nàng pơn jăt tai gàr niam ală cồng nha neh lơh geh, lơh geh cồng nha kơnòl broă sền gàr bơta lơngăp lơngai dà lơgar, gàr niam bơta lơngăp lơngai mpồl bơtiàn, Củ tịc lơgar ồng Tô Lâm sồr tàm tơngai tus, mpồl Kwang àng làng bol pơn jăt tai lam bơsram kơlôi sơơng nền nòn, lơh geh cồng nha ală jơnau lơh nền, jơnau sồr bơh Đảng, Dà lơgar dê bè sền gàr bơta lơngăp lơngai. Tơnơ̆ mờ dơ̆ tam jào broă, Ƀộ trưởng ồng Lương Tam Quang rơ̆p mhar sồr lơh ală gah broă sền gàr bơta lơngăp lơngai dà lơgar, gàr niam bơta lơngăp lơngai mpồl bơtiàn mờ bơ̆t bơtàu mpồl kwang àng làng bol, tàm pơn jăt tai ală nùs nhơm, bồ tơngoh kơlôi sơnơng, ală jơnau sồr lơh, ală broă lơh mờ ồng Củ tịc lơgar gam đơng lam, sồr lơh, mờ jơnau kờñ lơh geh cồng nha ală jơnau lơh nền bơh Đảng dê.