Đơs tàm dơ̆ lơh broă, Củ tịc lơgar ồng Tô Lâm đơs nền tàm broă rcang lài kơryan sa kuề sa kuà mờ bơta ờ niam, gah Kiểm sát Làng bol neh rcang lài, kràñ cê jơh nùs mut lơh bal mờ ală anih lơh broă geh gơnoar, lơh geh bơta tam gơl niam ngan tàm broă sền gŏ mờ lơh glài sa kuề sa kuà mờ bơta ờ niam. Gah broă pơgồp bal niam mờ ală anih lơh broă yal yă lơh mhar tŭ tơngai bơsong ală dơ̆ lơh tìs, dơ̆ broă, ngan là ală dơ̆ sa kuề sa kuà, lơh sa, gơnoar broă dờng, kal ke, gơwèt Mpồl đơng lam Dà lơgar dê bè rcang lài kơryan sa kuề sa kuà mờ bơta ờ niam, jat sền, đơng lam, geh ală dơ̆ broă kal ke jơh bal bè broă mờ ală bơta, ờ hềt geh bơh lài; gàr niam broă lơh glài kràñ cau tìs, mơkung gàr niam bơta niam kòn bơnus dê, geh bơta pơn jờng.

Đơs nền gơnoar broă mờ tă pơgồp bơh gah Kiểm sát Làng bol dê tàm broă lơh bơt bơtàu mờ bơtàu tơnguh, Củ tịc lơgar pin dờn là, tàm tơngai tus, gah Kiểm sát rơ̆p pơn jat tai geh ală broă lơh bơtàu tơnguh uă rlau tai, tơl làm  mờ pràn kơl dang rlau, tă pơgồp kwơ màng tàm broă lơh jat geh cồng nha Jơnau lơh nền tàm pơrjum dờng dơ̆ XIII bơh Đảng dê, lơh jat jơnau kờñ lơh niam wơl sền gàr adat boh lam mờ bơt bơtàu, lơh sir Dà lơgar gơnoar adat boh lam Xã hội củ nghĩa Việt Nam tàm tơngai pa.