Đơs đơng lam tàm pơrjum, Củ tịc lơgar ồng Tô Lâm, Thủ tướng Cíñ phủ ồng Phạm Minh Chính cih dờp, jờng rơ ală cồng nha lơh geh pơn rơ ngan bơh Quân ủy Dà lơgar, Ƀộ Ling klàng dê tàm tơngai pa do. Bè gùng dà broă lơh, kơnòl broă tàm tơngai tus, Củ tịc lơgar ồng Tô Lâm đơs sùm bàr pe tơngume Quân ủy Dà lơgar, Ƀộ Ling klàng pal lơh jat.

Tàm hơ̆, sơlơ tơnguh tai bơta pràn ai gah sền gàr Dà lơgar in, tơrgùm bơt bơtàu rài jơh gùt làng bol sền gàr Dà lơgar pơgồp bal mờ rài lơngăp lơngai làng bol. Bơt bơtàu mờ lơh jat niam pràn kơl dang “nùs nhơm rcang lài tàm làng bol” tàm rài jơh gùt làng bol sền gàr Dà lơgar, bơt bơtàu, lơh pràn nùs nhơm rcang lài jơh gùt làng bol sền gàr Dà lơgar kơ̆ kơl jăp. Sền gròi lơh jat niam broă dong kờl gơwèt mờ mpồl ling klàng mờ hìu bơnhă mpồl ling klàng dê mờ lơh pràn broă lơh “kis gĭt jơnau gĭt adat”. Pơn jat tai đơs nền mờ lơh gơ rề uă nùs nhơm “Cau ling Wa Hồ dê” tàm nùs nhơm làng bol.