Củ tịc lơgar tơlik nùs nhơm brơn brài tềng đăp ală broă bơtàu tơngguh pràn kơldang bơh gĭt gơ̆p đah Việt Nam mờ Australia dê tàm tơngai do, is ồn là broă 2 lơgar tơngguh broă gĭt gơ̆p gơguh Tam klăc lơh broă bal jŏ jòng tơl làm tàm nhai 03 nam 2024. Củ tịc lơgar sồr, jăt tàm tơnggume gĭt gơ̆p pa, 2 lơgar pơn jăt tai geh ală broă lơh, broă rơndăp lơh loh làng; gàr sùm broă tàm pơgơl mpồl kwang bàng lòt còp bal, tìp măt kwang bàng kâp dờng; sơlơ tàm yal tơnggĭt bal bè ală broă tàm tiah do, ală lơgar sền gròi bal; lơh broă bal lơh sa, kă bro phan mờ bơcri priă; lơh pràn lam lơh lơh broă bal tàm ală broă pa, bè rơcăng lài sơrlèt mờ tam gơl nhơm trồ tiah, năng lượng sàng goh, tam gơl sồ, bồ tơngoh jak kòn bơnus lơh geh is.

Củ tịc lơgar jờng rơ ală Hìu bơsram Đại họk lơgar Australia dê rề ơnàng lơh bal mờ lơgar Việt Nam, jờng rơ ngan lơgar Australia geh sùm ală bơnah priă dong kờl bơsram ai lơgar Việt Nam in mờ sồr Cíñ phủ lơgar Australia pơn jăt tai ai tơl bơta ƀươn ai mpồl bơtiàn cau Việt Nam in bơsram sră, ơm kis mờ lơh broă tàm lơgar do.