Pơgap 2 jơ 40 phuk mho ngai 12/7, Dơ̆ wă rò ngan ngồn Củ tịc lơgar ồng Tô Lâm neh geh bơyai lơh yŭ rơyùm tàm Gơlăng Bơtau tàm càr lơgar Phnom Penh tềng đap bơta đơng lam bơh Bơtau lơgar Campuchia ồng Norodom Sihamoni dê. Tơnơ̆ dơ̆ wă rò ngan ngồn tàm Gơlăng Bơtau, Củ tịc lơgar ồng Tô Lâm neh geh dơ̆ tìp mat mờ Bơtau lơgar Campuchia ồng Norodom Sihamoni.

Kung tàm mho ngai 12/7, Củ tịc lơgar ồng Tô Lâm neh tìp mat bơyai mờ Củ tịc Đảng Làng bol Campuchia, Củ tịc Thượng viện lơgar Campuchia ồng Hun Sen. Bàr nă kwang đơng lam bồ jờng rơ ală cồng nha lơh broă bal mờ 2 gah neh lơh geh tàm tơngai lài. Nàng kờñ ai bơta git gơp 2 lơgar bơtàu tơnguh pràn rlau tai tàm tŭ tơngai pa, bàr gah ring bal jơh nùs lơh jat niam ală jơnau ring bal kâp dờng, cồng nha dơ̆ tìp mat kâp dờng đah 2 Đảng, sơlơ tơnguh tai ală dơ̆ tìp mat đah kwang đơng lam bồ kâp dờng, ală kâp mờ tàm jơh ală gah, ngan là đah kwang đơng lam bồ kơnòm să mờ ơruh pơnu 2 lơgar, kung bè đah ală kwang đơng lam bồ kơnòm să tiah pe mum bơtàu tơnguh; lơh jat geh cồng nha ală gùng dà, broă lơh Anih duh broă lơh broă bal Việt Nam – Campuchia bè lơh broă bal lơh sa, niam chài mờ jak chài măi mok, Pơrjum lơh broă bal mờ bơtàu tơnguh ală càr tiah nhàr dà lơgar; jơh nùs lơh jat gùng dà, lơh broă bal pa bè Dơ̆ tìp mat đah pe Ƀộ Trưởng Ƀộ Cribơyai broă mờ lơgar ndai lơgar Việt Nam – Campuchia- Lào; sơlơ tơnguh tìp mat lơh kwèng mờ lơh broă bal, dong kờl bal mờ gơp đah ală anih lơh broă lơh adat boh lam, lơh jat adat boh lam mờ sền gàr adat boh lam, ală mpồl lơh broă làng bol mờ ală tiah bàr lơgar.

Mang dùl ngai bal, Bơtau lơgar Campuchia ồng Norodom Sihamoni neh đơng lam dơ̆ yờ sa yŭ rơyùm Củ tịc lơgar ồng Tô Lâm bal mờ Mpồl cau ala mat kâp dờng dà lơgar Việt Nam.