Ala măt ală cau tĕ khà chờ hờp Củ tịc lơgar ồng Tô Lâm neh geh Đảng, Quôk hội pin dờn jàu kơnòl broă kơn jơ̆ kơn jŭt pa, tơlik nùs nhơm jờng rơ ngan ală cồng nha pơnrơ bơh Dơ̆ pơrjum dơ̆ 07 pa do dê, tŭ Quôk hội neh lơh sir dồ bơnah dờng broă lơh bè broă lơh adăt boh lam, lơh nền uă broă kwơmàng bơh dà lơgar dê.

Củ tịc lơgar ồng Tô Lâm yal, broă geh pin dờn, pồ ăt gơnoar broă pa là bơta chờ hờp mơkung là kơnòl broă kơn jơ̆ kơn jŭt dờng ngan sơl, tơlik nùs nhơm kơ̆p kờñ rơ̆p pơn jăt tai dờp geh bơta dồ nùs bal, tàm lùp mờ tă pơgồp jơnau đơs bơh ală cau tĕ khà dê nàng gơtùi lơh sir kơnòl broă bơh Củ tịc lơgar dê, lơh gơs kơnòl broă là cau ala măt làng bol dê. Tàm dơ̆ tìp măt, Củ tịc lơgar đơs mờ cau tĕ khà bè uă broă loh làng bè bơta loh làng, song dơ pă ờ ndơ̆p mpồn tàm broă lơh rơndăp ù tiah; lơh bè lơi nàng tơngguh uă bơta gơtùi lơh jăt ngan ngồn, cồng nha broă lơh rơcăng pleh mờ bơta ồs sa, crùh ồs sa mờ jòi dong kờl cau gơtìp rềs àr; bè ală bơta ờ hềt dipal tàm broă lơh ătbồ sơnơm mờ phan ngui gah lơh sơnơm dê mờ uă geh cau tĕ khà lùp uă geh Quôk hội sền swì, ring bal tàm dơ̆ pơrjum dơ̆ 08 tus.