Củ tịc lơgar ồng Tô Lâm tus bal mờ đơs đơng lam tàm dơ̆ tơlik mat. Đơs tàm dơ̆ tơlik mat, ala mat kwang đơng lam bồ Đảng, Dà lơgar, Củ tịc lơgar ồng Tô Lâm jơh nùs ngan jờng rơ ală cồng nha, bơta pơnđơl pràn lơh ngan, bơta rcang lài, jơh nùs bơh Thàñ ủy, gơnoar atbồ, mpồl Kwang àng mờ ală anih lơh broă, mpồl lơh broă, gah lơh broă, mpồl cau ƀòn dờng Hồ Chí Minh dê tàm broă bơyai lơh lơh jat adat mờ rcang niam ngan ai broă tơlik mat mpồl tus bal sền gàr lơngăp lơngai, rơndăp tăp sèng ƀòn lơgar; hờn chờ mpồl tus bal sền gàr lơngăp lơngai, rơndăp tăp sèng ƀòn lơgar tàm ƀòn dờng Hồ Chí Minh dê mờ tàm jơh gùt lơgar neh ngan ngồn geh tơlik mat mờ mut lơh broă bơh tŭ do.

Củ tịc lơgar pin dờn, mờ bơhiàn pơn rơ ngan mờ cồng nha neh lơh geh tàm tơngai pa do, nam 2024 mờ ală nam pơn jat tai, kấp ủy, gơnoar atbồ mờ làng bol ƀòn dờng Hồ Chí Minh rơ̆p lơh sir geh cồng nha ală jơnau kờñ geh ai. Mpồl tus bal sền gàr lơngăp lơngai, rơndăp tăp sèng ƀòn lơgar rơ̆p lơh jat niam gơnoar broă dong kờl mpồl kwang àng mờ ală mpồl lơh broă geh gơnoar dê gàr kơ̆ lơngăp lơngai, rơndăp tăp sèng, pơgồp bơnah bơt bơtàu, bơtàu tơnguh ƀòn dờng ngai sơlơ lơngap lơngai, pas niam, niam jak, nùs nhơm kờñ gơboh bal tài bơta ring lơngai, hờn chờ bơh làng bol dê.