Đơs tàm dơ̆ lơh, Củ tịc lơgar ồng Tô Lâm tơngŏ bơta chờ hờp geh rê còp ù tiah kăc màng tiơng pơn rơ ngan Pắc Bó dê là tiah ơm rềp mềr ngan mờ Wa Hồ, là tiah rềp mềr ngan kah yau kăc màng bơh Đảng, Dà lơgar dê; mơkung geh sền gŏ mờ mat ală bơta tam gơl tàm rài kis bơh làng bol tiah do dê, geh sền gŏ ală broă lơh bơt bơtàu, ală rơndăp broă lơh tờm bơh càr dê neh cèng wơl ală cồng nha niam ngan, pơgồp bơnah bơtàu tơnguh rài kis phan bơna mờ nùs nhơm bơh làng bol tàm tiah do dê.

Củ tịc lơgar jờng rơ uă ngan kơnhoàl Hà Quảng ală nam do neh tơrgùm bơtàu tơnguh lơh sa, mpồl bơtiàn, gàr niam lơngăp lơngai Dà lơgar mờ bơta lơngăp lơngai, mơya kung sùm gàr niam bơtàu tơnguh rài kis bơh làng bol dê. Củ tịc lơgar đơs loh, tŭ gam kis Wa Hồ kờñ gơboh sùm sền gròi ngan broă lơh sền gròi ai rơnàng kơnòm să in, ngan là ală sau kơnòm pa tàu, kơnòm dềt... mờ do kung là kơnòl broă mờ Đảng mờ Dà lơgar sùm sền gròi nàng jơh ală kơnòm dềt in ndrờm geh lòt bơsram, geh dờp bơta kwơ bơh ală cồng nha kăc màng dê. Den tàng bè hơ̆, broă tơnguh uă bơta niam bơto bơtê là broă kwơ màng ngan, tàm hơ̆ pal sền gròi mơ tơn bơh ală kấp bơsram mầm non dê.