Tàm dơ̆ wă, Củ tịc lơgar ồng Tô Lâm ai lơh chờ hờp ngan dơ̆ sơn rờp geh tìp ală Đại sứ, Kwang ala mat Mpồl tam klac câu Âu (EU) tàm gơnoar broă pa; ưn ngài ală jơnau nting bơr chờ gờm niam bơnĕ bơh kwang đơng lam bồ kâp dờng EU mờ ală lơgar tàm mpồl mờ ală Đại sứ, Kwang ala mat. Củ tịc lơgar đơs nền, EU mờ ală lơgar tàm mpồl là ală lơgar mờ mpồl lơh broă bal kuơmàng bơh Việt Nam dê; kơp kờñ ală Đại sứ, kwang ala mat rơp sùm là rbàng tơrbŏ kuơmàng, tă pơgồp uă rlau tai tàm broă sơlơ tơnguh tai bơta git gơp lơh bơyô, lơh broă bal tơl làm đah Việt Nam mờ EU mờ ală lơgar tàm mpồl tàm tơngai tus, pơgồp bơnah gờñ ai bơta git gơp lơh broă bal đah Việt Nam mờ EU mờ ală lơgar tàm mpồl bơtàu tơnguh tus bơta pa.

Củ tịc lơgar kung sồr ală Đại sứ, kwang ala mat pơn jat tai lơh ală dơ̆ cribơyai mpồl kwang bàng ală kâp mờ geh jơnau đơs hòi jà ală lơgar EU ờ hềt ring bal Hiệp địñ sền gàr, dong kờl bơcri priă đah Việt Nam – EU (EVIPA) gờñ ring bal Hiệp địñ mờ Ủy ƀan câu Âu gờñ sơrbì jơnau kơryan IUU gơ wèt mờ tac hờ lơgar ndai phan tàm dà bơh Việt Nam dê, dong Việt Nam bơtàu tơnguh lơh sa dà lềng, ròng tam phan tàm dà lềng kơ̆ kơljap.