Củ tịc Mặt trận lơgar Lào bơ̆t bơtàu Dà lơgar ồng Sinlavong Khoutphaythoune tơlik nùs nhơm brơn brài mờ chờ hờp lòt còp să Củ tịc lơgar ồng Tô Lâm. Ồng Sinlavong Khoutphaythoune đơs sùm rơ̆p pơn jăt tai pơgồp bal niam mờ Mặt trận Dà lơgar Việt Nam mờ sền gròi, dong kờl, ai tơl bơta ƀươn ai cau Việt Nam in lơh sa, ơm kis tàm lơgar Lào.

Củ tịc lơgar ồng Tô Lâm chờ hờp jờng rơ ală cồng nha dờng ngan mờ Đảng, Dà lơgar bal mờ Làng bol lơgar Lào dê đơs bal mờ Mặt trận lơgar Lào bơ̆t bơtàu dà lơgar dê neh lơh geh tàm tàm tơngai do; mờ pin dờn bơh bơta tề lam àng sơrdah ngăc ngar bơh Đảng Làng bol Kăc màng Lào dê, ală oh mi Lào rơ̆p bơ̆t bơtàu gơtùi dà lơgar bơtàu tơngguh, pas sơm.