Củ tịc lơgar tơngŏ bơta hờn chờ tềng đăp ală bơta bơtàu tơnguh pràn kơl dang bơh bơta gĭt gơ̆p lơh broă bal kwơ màng Việt Nam mờ New Zealand dê tàm tơngai pa do. Củ tịc lơgar jờng rơ uă ngan lơh broă bal niam tàm gah sền gàr Dà lơgar mờ bơta lơngăp lơngai đah 2 lơgar dê, tơngŏ bơta pin dờn bal mờ gơ̆p; jờng rơ ală bơta bơtàu tơnguh niam ngan tàm lơh broă bal lơh sa kă bro; ưn ngài lơgar New Zealand dong kờl bơto bơtê jơnau đơs dà Mỹ mờ ală broă lơh mờng chài ai kwang bàng kấp Dà lơgar mờ ală tiah lơgar Việt dê in. Củ tịc lơgar kung sồr Cíñ phủ New Zealand pơn jat tai lơh geh bơta ƀuơn ai mpồl bơtiàn cau Việt Nam in bơsram sră, ơm kis mờ lơh broă tàm lơgar New Zealand.

Kwang atbồ anih lơh broă ala mat lơgar New Zealand tàm lơgar Việt Nam tơngŏ bơta hờn chờ dờp lơh kơnòl broă tàm lơgar Việt Nam. Kwang atbồ anih lơh broă ala mat lơgar New Zealand tàm lơgar Việt Nam ring bal là, nam 2025 là tŭ tơngai niam nàng 2 lơgar in sơlơ tơnguh tai mờ lơh jrô ơnàng làm uă rlau tai bơta gĭt gơ̆p đah Việt Nam mờ New Zealand.