Củ tịc lơgar ồng Tô Lâm gờm chờ mò Đại sứ geh kơnòl broă lơh broă geh cồng nha ngan tàm lơgar Việt Nam; jờng rơ uă ngan mò Đại sứ neh tă pơgồp jơh nùs ngan tàm broă bơt bơtàu bơta gĭt gơ̆p đah lơgar Việt Nam mờ Thụy Điển.

Củ tịc lơgar đơs sùm, Dà lơgar, Cíñ phủ mờ làng bol Việt Nam ờ tŭ lơi hŭi mờ sền dờng màng nùs nhơm lơh bơyô bal, bơta kờñ mờ dong kờl kwơ màng, tơngŏ bơta tam klăc bal mờ Bơtau, Cíñ phủ mờ làng bol Thụy Điển neh lời ai lơgar Việt Nam in tàm broă lơh tam lơh ai geh lơngăp lơngai tơrgùm dùl Dà lơgar lài do mờ tàm tơngai bơt bơtàu, bơtàu tơnguh Dà lơgar tŭ do dê. Củ tịc lơgar jờng rơ ală mpồl lơh sa kă bro lơgar Thụy Điển sơlơ tơnguh tai bơcri priă tàm lơgar Việt Nam tàm ală gah Thụy Điển geh bơta ƀuơn bơta pràn bè bơt bơtàu phan bơna, gùng lòt jun pơdiang phan, năng lượng lơh gơlik wơl, rơndăp ù tiah tiah drà, bơtàu tơnguh kơ̆ kơl jăp.