Tàm dơ̆ wă, Củ tịc lơgar ồng Tô Lâm đơs nền, Đảng, Dà lơgar mờ Làng bol Việt Nam sùm sền dờng màng ngan bơta gĭt gơ̆p ờs mờng bơh yau dờng màng ngan, là cau bơyô mờ kung là oh mi mờ lơgar Cuba; tơlik nùs nhơm chờ hờp tŭ gĭt gơ̆p lơh broă bal is ồn đah bàr lơgar sùm geh lơh kơ̆ kơl jăp mờ geh uă broă bơtàu tơngguh pràn kơldang, tơl làm tàm tŭ tơngai dunia gơbàn kal ke ngan.

Nàng pơn jăt tai tơngguh tai gĭt gơ̆p lơh broă bal tơl làm đah Việt Nam mờ Cuba, Củ tịc lơgar sồr 2 gah gàr sùm broă tàm pơgơl mpồl kwang bàng lòt còp bal, tìp măt tơm bơh bơr kwang bàng kâp dờng; pơgồp bal niam, lam lơh geh cồng nha ală jơnau ring bal kwang bàng kâp dờng dê, ală mpồl lơh broă bal neh geh lài nàng kờñ ai bơta gĭt gơ̆p is ồn đah Việt Nam mờ Cuba gơlòt mŭt ngan ngồn tàm uă broă mờ geh cồng nha rlau. Đơs tus broă lơh broă bal 2 gah, Củ tịc lơgar kơ̆p kờñ 2 gah lam lơh jăt geh cồng nha ală broă lơh broă bal bơtàu tơngguh broă lơh sa sươn sre, tơngguh tai gĭt gơ̆p lơh sa- kă bro phan- bơcri priă 2 gah, kung bè rề ơnàng rlau tai tus ală broă ndai mờ tơl gah geh bơta pràn.