Củ tịc lơgar đơs nền, lơgar Việt Nam sền bơtàu tơngguh gĭt gơ̆p lơh bơyô bal, lơh broă bal mờ lơgar Lo là săc jŏ jòng, ai lài khà dùl tàm jơh ală gùng dà lơh broă mờ lơgar ndai lơngăp lơngai is, rơcăng lài is, lơh bơyô mờ uă lơgar, lơh uă bơta gĭt gơ̆p lơh broă mờ lơgar ndai bơh Việt Nam dê.

Bè gùng dà, kơnòl broă tàm tơngai tus, Củ tịc lơgar kơ̆p kờñ bàr gah pơgồp bal niam tàm bàr pe broă kwơmàng, bè: lơh sùm broă lòt còp, tìp măt kwang bàng kâp dờng mờ ală kâp, lam lơh jăt geh cồng nha ală mpồl lơh broă bal; lơh pràn mờ tơngguh uă cồng nha lơh broă bal ngan ngồn tàm ală broă, sơlơ tàm tơrbŏ gùng rơndeh ồs lòt gan tiah nhàr lơgar mờ lơh broă bal bơtàu tơngguh bàr pe gùng rơndeh ồs ơnàng tơl di jơnau sồr tàm ală càr tiah đah tô Việt Nam; sồr lơgar Lo pơn jăt tai pờ mpồng drà kă bro ai phan lơh geh bơh sươn sre, phan tàm dà, plai chi, puăc phan puan jơng, puăc phan bàr nơm jơng bơh Việt Nam dê in. Wèt tus tềl kah kwơmàng tàm nam 2025, dơ̆ tơngkah kir sơnrai 75 nam lơh gĭt gơ̆p cribơyai broă mờ lơgar ndai đah Việt Nam mờ Lo, Củ tịc lơgar ồng Tô Lâm sồr bàr gah pal lơh ngan pơnđơl pràn chồl tơngguh, ai gĭt gơ̆p 2 gah gơguh tus gơnoar broă dờng pa, ngai sơlơ ngan ngồn, geh cồng nha rlau.