Tềng đăp rùp rài Củ tịc Hồ Chí Minh, Củ tịc lơgar ồng Võ Văn Thưởng bal mờ mpồl kwang bàng neh kun bồ kah kơlôi tus Wa Hồ, tơlik nùs nhơm git ưn ngài uă ngan bè broă lơh bơh Wa Hồ dê, Kwang đơng lam jăk chài, Cau pơgru jăk ngan bơh kăc màng lơgar Việt Nam dê, jơh rài kis lơh broă nàng geh bơta lơngăp lơngai is jơi bơtiàn in, dà lơgar tơrgùm bal, ai geh bơta khăt gơboh is, gơboh gơbài làng bol in.

Sàl Nà Nưa geh lơh tàm bă brê Nà Nưa, tàm thôn Tân Lập, xã Tân Trào, kơnhoàl Sơn Dương, do là tiah Wa Hồ neh ơm, lơh broă bơh lồi nhai 5 tus ngai 22 nhai 8 nam 1945, Củ tịc Hồ Chí Minh sền Sră cih jơnau yal bơr lơngăp lơngai is, crơng gơs dà lơgar Việt Nam Zân củ Kộng hoà. Pơn jăt mờ hơ̆, Củ tịc lơgar ồng Võ Văn Thưởng bal mờ mpồl kwang bàng lơh broă neh chu ñàng tềng Anih duh khoai Tân Trào, do là tiah geh bơyai lơh Pơrjum Kwang bàng ala măt làng bol gùt lơgar, hơ̆ là Quốk hội lơgar Việt Nam tŭ do.