Hơ̆ là ală kwang bàng: Tổng Ƀí thư, Củ tịc lơgar Lào lài do ồng Choummaly Sayasone; Tổng Ƀí thư, Chủ tịch lơgar Lào lài do ồng Bounnhang Vorachith mờ Thủ tướng Cíñ phủ Lào lài do ồng Thongsing Thammavong.

Củ tịc lơgar ồng Võ Văn Thưởng tơngŏ bơta chờ hờp geh tìp mat ală kwang bàng, cau gơ̆p bơyô rềp mềl jŏ sơnam bơh kwang đơng lam bồ mờ làng bol lơgar Việt Nam dê; jơh nùs ưn ngài ală kwang bàng đơng lam bồ lài do lơgar Lào dê neh geh uă dà kơl hề tă pơgồp mờ tă pơgồp dờng màng tàm broă bơt bơtàu ai bơta gĭt gơ̆p jơh nùs, tam klăc bal kwơ màng Việt Nam mờ Lào kung bè sùm sền gròi, dong kờl ai bơta bơtàu tơnguh tơl làm bơh bơta gĭt gơ̆p lơh bơyô bal mờ lơh broă bal đah 2 lơgar. Củ tịc lơgar tơngŏ bơta pin dờn, bơh bơta đơng lam jak chài ngan bơh Đảng Làng bol kăc màng lơgar Lào dê, Dà lơgar Lào rơ̆p gờñ sơr lèt gan bơta kal ke, ngai sơlơ bơtàu tơnguh is, rcang is, pas gơs, làng bol lơgar Lào oh mi ngai sơlơ hờm ram mờ chờ hờp.