Sền wơl gùng lòt rlau 30 nam 2 lơgar lơh bơta gĭt gơ̆p cribơyai broă mờ lơgar ndai, Củ tịc lơgar đơs sùm, Việt Nam mờ Kazakhstan geh tơl ală bơta nàng gơ gơs ală cau gơ̆p bơyô niam tàm gùng lòt bơtàu tơnguh pa.

Đơs tàm dơ̆ yờ sào, Củ tịc lơgar ồng Võ Văn Thưởng đơs nền, 2 lơgar pơn yờ să bè bơta tam klăc bal, gĭt gơ̆p lơh bơyô bal, đềt mềr bal, lơh broă bal đah 2 gah sùm geh bơtàu tơnguh, ngai sơlơ geh bơt bơtàu mờ bơtàu tơnguh. Mờ broă tàm dơ̆ lòt còp do, Kwang đơng lam bồ 2 lơgar neh ring bal ală gùng dà pơlam kwơ màng nàng sơlơ bơtàu tơnguh lơh broă bal 2 lơgar, Củ tịc lơgar pin dờn, mờ nùs nhơm bồ tơngoh mờ bơta đơng lam kràñ ngan bơh Kwang đơng lam bồ kấp dờng 2 lơgar dê, ală sră nggal lơh broă bal mờ jơnau ring bal lơh geh tàm dơ̆ lòt còp dơ̆ do rơ̆p geh 2 gah lam lơh jăt geh cồng nha, ai lơh broă bal đah Việt Nam mờ Kazakhstan ngai sơlơ bơtàu tơnguh.