Tàm sră pơyua geh gơl cih, “Trung thu là Sa tềp kơnòm dềt dê. Pah dơ̆ Trung thu, ală sau geh bal mờ gơ̆p nhơl tai, bal mờ mè bèp, ồng mò ơm lềr wềl bal kềng sơlàu ƀañ kèu nàng sền àng kơnhai ndar me, nàng gĭt gŏ bal jrô ơnàng bơta kwơ nùs nhơm cau pròc mhàm, ròng gàr ală hwềng nùs song niam ngan, àng sơrdah ngan bơh sơnam kơnòm dềt dê. Trung thu kung là Sa tềp bơh bơta kờñ gơboh mờ tam pà bal dê, là tŭ nàng cau dờng in tơngkah is he pal sền gròi rlau tai tus kơnòm dềt bơh bơta kờñ gơboh, kơnòl mờ ală broă lơh geh kwơ ngan. Ngan là sền gròi ală sau geh rài kis kal ke, ală sau kòn đời, ală sau tàm tiah sar lơgar ngài, tiah nhàr lơgar, tiah bồt bơlào...nàng tơl nă kơnòm dềt in geh wă rò Sa tềp Trung thu wil tơl mờ niam bơnĕ, geh bơsram, bơceh lơh mờ chờ hờp tàm bơta kờñ gơboh bơh hìu bơnhă, mpồl bơtiàn dê. Añ ngoh rơngăc ngan mờ chờ hờp ngan tŭ tàm tơngai lài, ală sau geh uă bơta gơguh jak, lơh uă broă niam, dòn bơr mờ mè bèp, ồng mò, gĭt dong kờl mờ tam pà bal mờ ală cau ờ bơtuah rlau mờ he. Añ kơ̆p kờñ ală sau sùm sùm ròng gàr ală bơta kơ̆p kờñ niam, kờñ gơboh hìu bơnhă, duh rơngòt gĭt jơnau, gĭt tam klăc, dong kờl bal, tàm pơrlòng lơh rbô broă niam, dipal là kòn dòn bơr, kơnòm bơsram jak, là sau gơlòng sồr Wa Hồ dê”.

Drim ngai 27/09, Phó Củ tịc lơgar, Củ tịc Mpồl duh broă Kes priă Sền gàr, dong kờl kơnòm dềt lơgar Việt Nam mò Võ Thị Ánh Xuân neh tus còp, pà phan ai ală kơnòm dềt tàm Anih tờm Sền gàr, dong kờl mpồl bơtiàn càr Dăk Lăk in. Tàm do, Phó Củ tịc lơgar mò Võ Thị Ánh Xuân neh lùp còp, pơndờm pơnđiang mờ pà ală phan pà là ƀañ trung thu ai ală kơnòm dềt in mờ pà 50 tơlak đong ai Anih tờm Sền gàr, dong kờl mpồl bơtiàn càr Dăk Lăk in nàng pơgồp bơnah dong kờl ală kơnòm dềt geh rài kis kal ke ờ bơtoah gam kis mờ bơsram sră tàm Anih tờm dê.

Phó Củ tịc lơgar mò Võ Thị Ánh Xuân jờng rơ mờ jờng rơ uă ngan ală cồng nha neh lơh geh bơh kwang bàng, mpồl kông ñân viên cứk Anih tờm Sền gàr dong kờl mpồl bơtiàn càr Dăk Lăk dê tàm tơngai pa do. Ală broă lơh bơh Anih tờm dê neh pơgồp bơnah đơs nền ală broă lơh di pal ngan bè gah sền gàr niam rài kis mpồl bơtiàn bơh Đảng, Dà lơgar dê tàm broă sền gàr, ròng siam cau kra dùl nă să ờ geh tiah kơldìng, kơnòm dềt kòn đời mờ kòp jê gơtìp sang tĕ.