Đơs tàm dơ̆ lơh broă, Củ tịc lơgar ồng Võ Văn Thưởng jờng rơ uă ngan ală cồng nha Gah Kiểm sát neh lơh geh tàm tơngai pa do, mơkung sồr gah Kiểm sát tềng đap tơl dơ̆ broă pal sền wì, kơlôi sơnơng, kơrhia ngan, lơh di pal, ngui adat boh lam ngăc ngar, ơn bơta kwơ bơh Dà lơgar bal mờ làng bol dê hơđang ngan rlau jơh. Tơl nă cau lơh tìs pal geh lơh glài di tŭ, di pal song dơ pă, di cau, di glài, di adat boh lam, ờ lời gơlik geh oan tìs, lơh hŭi cau lơh tìs, lơh glài kràñ ngan cau tờm atbồ sồr lơh, mơkung tam cah loh làng broă lơh tìs bơh tơl nă cau lơh tìs dê, gàr geh bơta di nùs, di tồr, di mờ adat boh lam, geh bơta bơto tơngkah kòn bơnus, gơtùi dờp.

Củ tịc lơgar kung sồr, bơh ală dơ̆ broă, broă lơh, gah lơh broă pal kơlôi sơnơng, sền sơ wì nàng sơñio loh ală bơta ờ niam bơh broă lơh, adat boh lam dê, di tŭ pơgồp jơnau đơs mờ Đảng, Dà lơgar nàng bơt bơtàu broă lơh, lơh sir kơrnoat boh lam, lơh sir gùng dà niam ngan kơnòl broă neh geh làng bòl jàu bè jat sền gơnap gơnoar Dà lơgar tàm broă lơh sền gàr adat boh lam.