Tàm pang sră, Củ tịc lơgar đơs tờm: “Đảng, Dà lơgar he sùm ai broă bơto mờ bơsram là broă lơh lài ngan dà lơgar dê. Bơto mờ bơsram, bơsram tàp ală kơnòm dềt là kơnòl bal bơh hìu bơsram – hìu nhă bal mờ mpồl bơtiàn dê. Dùl lơgar kờñ bơtàu tơnguh pal geh broă bơto mờ bơsram niam uă mờ geh bơcri priă ai broă bơto mờ bơsram là bơcri priă ai broă bơtàu tơnguh kơl jăp in. Añ kơ̆p kờñ ală cau pơgru pal gàr sùm nùs nhơm gơboh kờñ, jơh nùs mờ broă bơto, bồ tơngoh ngăc ngar kơ̆ dơn sơrlèt mờ ală bơta gơkòl, kal ke, pơgồp bal uă rơlao tai ai broă bơto kòn bơnus kwơ màng in. Añ kơ̆p kờñ ală cau mè bèp, tài rài tơnơ̆ do oh kòn he dê, pal tus bal mờ hìu bơsram mờ mpồl bơtiàn tàm broă bơto mờ bơsram, drơng gàr ai ală oh in. Añ hòi jà ală kấp ủy, mpồl đảng, gơnoar atbồ drơng rơlao tai tus mờ broă bơto mờ bơsram mờ ală kơrnoăt di tŭ mờ di pal, bơ̆t bơtàu geh tiah niam broă bơto mờ bơsram in mùl màl kloh niam, niam bơnĕ, lơngăp lơngai, nàng ală cau pơgru bal mờ ală kơnòm bơsram, cau bơsram dờng geh bơto mờ bơsram tàm nùs nhơm chờ hờp, gơboh gơbài, geh tơnguh uă ngan bơta pràn bơceh pa, pơgồp bal kwơ màng tàm broă lơh geh cồng nha broă tam gơl tờm mờ tơl ală bơta broă bơto mờ bơsram Dà lơgar he dê”.