Củ tịc lơgar ồng Võ Văn Thưởng tơlik nùs nhơm chờ hờp dơ̆ sơnrờp lòt còp càr lơgar Vienna, plai nùs lơgar Áo dê, anih tờm niam chài câu Âu dê, tiah prăp gàr, sền gàr ală bơta kwơ niam chài bơh câu Âu dê mờ uă nam sùm geh săc rwah là ƀòn dờng pal kis ngan rlau jơh tàm dunia. Kwang ătbồ ƀòn dờng Vienna, lơgar Áo tơlik nùs nhơm chờ hờp geh wă rò Củ tịc lơgar Việt Nam ồng Võ Văn Thưởng mờ pơ ùr bal mờ Mpồl ala măt Kwang bàng kâp dờng lơgar Việt Nam dê lòt còp ngan ngồn lơgar Áo mờ càr lơgar Vienna.

Kwang ătbồ ƀòn dờng Vienna yal mờ Củ tịc lơgar in bè broă bơtàu tơnguh lơh sa mpồl bơtiàn bơh ƀòn dờng Vienna dê. Kwang ătbồ ƀòn dờng Vienna neh yal wơl ală Pơrjum jak chài bè Củ tịc Hồ Chí Minh, bơta lơh broă bal niam bơnĕ đah càr lơgar Vienna mờ càr lơgar Hà Nội, yal wơl ală dơ̆ lòt còp lơgar Áo bơh Kwang đơng lam bồ kâp dờng lơgar Việt Nam dê. Tàm tŭ gĭt gơ̆p đah lơgar Việt Nam mờ Áo gam bơtàu tơnguh niam bơnĕ, ƀòn dờng Vienna, lơgar Áo dê kơ̆p kờñ lơh pràn lơh kwèng lơh broă bal mờ ală tiah lơgar Việt Nam dê, ngan là bè kă bro, lòt nhơl, tìp măt lơh kwèng gah làng bol, niam chài mờ đơs crih tam ya.