Cribơyai bè tơngume uă cau tĕ khà đơs là broă lơh rơcăng, sơndră sa kwề sa kwà, Củ tịc lơgar ồng Võ Văn Thưởng đơs nền, Đảng rơ̆p pơn jăt tai lơh pràn broă lơh rơcăng sơndră sa kwề sa kwà, bơta ờ niam; kràñ cê jơh nùs, kơ̆ dơn bơsong kràn kwang bàng sa kwề sa kwà, bơta ờ niam bal mờ nùs nhơm là ờ geh anih kơryan. Mờr tus rơ̆p geh ală dơ̆ yă lơh tìs sa kwề sa kwà ndai geh ai tơlik cah rña. Tàm dơ̆ tìp măt, ală cau tĕ khà kung yal bàr pe broă ndai bè đơs broă lơh tơrlòng lài bơ̆t bơtàu gơnoar ătbồ tiah drà bơh ƀòn dờng Đà Nẵng dê; tă bơsong kal ke ai mpồl lơh sa kă bro in; gah ròng phan gam kal ke tài kơnờm phan sa siam phan ròng blơi bơh lơgar ndai; gơguh uă tai cau lơh tìs măy mok pa; jơnau lơh dră wơl cau lơh jăt kơnòl broă dà lơgar ngai sơlơ uă; jơnau ma túy mờ tam lơh tàm hìu bơsram. Ồng Nguyễn Văn Quảng, Ƀí thư Thàñ ủy, Kwang ătbồ Mpồl Kwang bàng Quôk hội ƀòn dờng Đà Nẵng kung neh mblàng hơ ală tơngume do cau tĕ khà in.