Di dơ̆ tơngakh kir sơnrai Ngai Cau lơh sa kă bro lơgar Việt Nam, 13/10, wèt tus tơngkah kir sơnrai 9 nam ngai tơlik mat Mpồl cau ùr lơh sa kă bro Việt Nam 19/10 mờ Ngai Cau ùr Việt Nam 20/10, mho ngai 5/10, tàm Hìu lơh broă Củ tịc, Củ tịc lơgar ồng Võ Văn Thưởng tìp mat Mpồl 90 nă ùr lơh sa kă bro pơn rơ jak ngan bơh Ală mpồl cau ùr lơh sa kă bro lơgar Việt Nam.

Đơs sùm, Đảng, Dà lơgar sùm sền gròi, lơh geh ală bơta ai bơta bơtàu tơnguh dờng pràn bơh mpồl cau lơh sa kă bro Việt Nam dê, tàm hơ̆ geh ùr lơh sa kă bro, Củ tịc lơgar kơ̆p kờñ Mpồl cau ùr lơh sa kă bro Việt Nam sùm là tiah dong kờl, pơndờm pơnđiang bơta kơ̆p kờñ di pal lơh pas ngan bơh cau ùr, bơh ùr lơh sa kă bro Việt Nam dê; ngan là lơh geh bơta gơ kờñ pràn kơl dang ngan bè bơta pơnđơl pràn lơh ngan brồ guh, pơn jờng ală bơyô kơnòm să lơh pas di pal. Mờ khà cau ùr lơgar he dê geh tus 50% khà kờp làng bol mờ geh pơgap 50% cau lơh broă là cau ùr, Củ tịc lơgar đơs là, khà 8 rơbô nă cau ùr là cau lơh sa kă bro tus bal tàm Mpồl cau lơh sa kă bro cau ùr ờ hềt đơs jơh bơta pràn bơh cau ùr lơh sa kă bro lơgar Việt Nam dê. Den tàng, Củ tịc lơgar kơ̆p kờñ Mpồl cau ùr rề ơnàng broă lơh làm uă 63 càr, ƀòn dờng. Củ tịc lơgar ồng Võ Văn Thưởng kung sồr ală ùr lơh sa kă bro pơn jat tai tă pơgồp jơnau đơs tơrmù ƀà ală sră nggal kal ke, lơh geh tiah bơcri priă lơh sa kă bro ƀuơn ngan rlau tai; pơgồp bơnah bơt bơtàu ală broă lơh bơtàu tơnguh Dà lơgar.