Tàm dơ̆ tìp mat, Củ tịc lơgar ồng Võ Văn Thưởng đơs nền, Đảng mờ Dà lơgar Việt Nam sùm lơh gơlik bơta ƀuơn ai ală gah jat yàng in lơh broă, bơtàu tơnguh jat jơnau cih bơh Sơnua boh lam mờ adat boh lam dê; tàm hơ̆ geh Adat pin dờn jat yàng mờ pơn jat tai lơh sir tơngume adat boh lam ai broă lơh pin dờn jat yàng bơh làng bol mờ ală mpồl jat yàng dê in. Củ tịc lơgar ồng Võ Văn Thưởng đơs bơta kơp kờñ Thủ tướng Hồng y Pietro Parolin pơn jat tai lời ai uă bơta sền gròi tus broă lơh bơh mpồl bơtiàn jat yàng Bàp tàm lơgar Việt Nam dê in.

Thủ tướng, Hồng y Pietro Parolin đơs niam ală cồng nha bơh lơgar Việt Nam dê tàm broă gàr khat gơboh jat yàng ai jơh ală gah jat yàng in, tàm hơ̆ geh yàng Bàp. Thủ tướng Vatican ưn ngài mờ cih dờp bơta jơh nùs bơh lơgar Việt Nam dê bè ală tă pơgồp bơh mpồl jat yàng Bàp Việt Nam dê, kuơmàng là tàm ală gah lơh broă dong kờl is, bơto bơsram, lơh sơnơm, bơto broă lơh. Thủ tướng Vatican jờng rơ gơnoar broă bơh Mpồl lơh broă bal Việt Nam mờ Vatican dê tàm broă sơlơ tơnguh rlau tai bơta wă wờng mờ pin dờn bal mờ gơp.