Củ tịc lơgar ồng Võ Văn Thưởng neh geh uă broă lơh kwơ màng: tus bal tìp mờ chờ gờm Cau bơtau lơgar Anh ồng Charles III; Tìp Thủ tướng lơgar Anh ồng Rishi Sunak; wă Củ tịc Hạ viện lơgar Anh ồng Lindsay Hoyle, Phó Củ tịc Hạ viện ồng Nigel Evans, Ƀộ trưởng Ngoại giao lơgar Anh ồng James Cleverly, Ƀộ trưởng Quốk phòng ồng Ben Wallace mờ uă kwang bàng tàm Cíñ phủ lơgar Anh.

Tàm ală dơ̆ tìp, Củ tịc lơgar ồng Võ Văn Thưởng bal mờ Cau bơtau lơgar Anh ồng Charles III, kwang đơng lam Cíñ phủ, Quốk hội lơgar Anh ndrờm đơs là, bơta geh lơh broă bal đah bàr lơgar Anh mờ Việt Nam là uă ngan. Bàr gah kung tơlik nùs nhơm lơh ngan tàm broă tơnguh bơta git gơ̆p tus tàm bơta pa; ring bal pơn jăt tai tơnguh broă tam gơl mpồl kwang bàng ală kấp, tàm hơ̆ uă ngan là kấp dờng tàm ală gah Đảng, Dà lơgar, Cíñ phủ, Nghị viện mờ tìp bal làng bol. Bàr gah kung ring bal pơgồp bal nền nòn mờ kờñ bal tàm ală broă pơrjum uă lơgar bè lơgar Anh mờ mpồl ASEAN, Liên hợp quốk, Mpồl duh broă Gơnoar kòn bơnus tơngai bơh nam 2023 tus 2025 mờ Hiệp định Lơh broă bal tơl ală bơta mờ gơguh jăk gan Thái Bình Dương.