Dơ̆ lòt còp bơh Củ tịc lơgar Việt Nam ồng Võ Văn Thưởng dê tus lơgar Lào neh geh tus 18 broă lơh li la mờ rơ̆ ru ngan tàm càr lơgar Vientiane, bal mờ uă cồng nha loh làng, lơh gơlik bơta gơn kơnờm pa, geh gơtha kwơmàng ngan ai gĭt gơ̆p lơh broă bal đah Việt Nam mờ Lào in tàm jơh ală broă mờ gah lơh broă bal. Dơ̆ lòt còp pơgồp bơnah lam lơh geh cồng nha ală jơnau ring bal kwang bàng kâp dờng bơh bàr Đảng, bàr Dà lơgar dê, kwơmàng là Jơnau Ring bal Broă rơndăp lơh lơh broă bal đah Việt Nam mờ Lào tơngai bơh nam 2021- 2030 mờ Hiệp địñ bè lơh broă bal 2 gah đah Việt Nam mờ Lào tơngai bơh nam 2021- 2025. Tàm dơ̆ lòt còp dơ̆ do, kwang đơng lam bồ Kâp dờng bàr lơgar dê đơs nền tai sùm sền dờng màng mờ lời bơta ai lài uă ngan rlau jơh ai broă lơh pràn kơldang mờ sơlơ tơnguh tai gĭt gơ̆p lơh bơyô bal dờng màng ngan mờ tam klăc bal uă ngan mờ lơh broă bal tơl ală bơta đah Việt Nam mờ Lào; sền do là jơtài kas màng ngan, jơnau kis gơs gơwèt mờ broă lơh tam gơl bơta yau gơs bơta pa bơh tơl lơgar dê.