Tàm dơ̆ bơyai lơh, Củ tịc lơgar ồng Võ Văn Thưởng đơs nền, lòt gan 60 nam, VCCI neh pơn đơl pràn lơh gơs tơl kơnòl broă geh jàu, sơlơ tơnguh bơta dờng pràn bơh ală mpồl lơh sa kă bro mờ Mpồl cau lơh sa kă bro dê. Bơh hơ̆ pơgồp bơnah tàm bơta bơtàu tơnguh bơh dà lơgar dê. Tơngai tus, Củ tịc lơgar sồr, VCCI mờ ală mpồl lơh sa kă bro, cau lơh sa kă bro pal lơh gơlik bơta pràn bơh mat kă bro Việt Nam dê tàm broă kă bro, mut gơ rờm bal dunia geh cồng nha, rề ơnàng lơh bal mờ ală mpồl lơh broă bal dunia jat nùs nhơm bal mờ gơp lơh geh cồng nha.

Tơl nă cau lơh sa kă bro pal git loh gơnoar broă tàm mpồl tam klac dờng jơh gùt jơi bơtiàn, sơlơ tam klac, lơh broă bal mờ kông ñân, cau lơh broă sa mờ mpồl cau geh bồ tơngoh git wă, tềng đap bơta đơng lam bồ bơh Đảng dê tài jơnau kờñ làng bol pas sơm, dà lơgar pràn kơldang, làng bol lơh tờm, gơguh jak. Củ tịc lơgar tơngkah, cau lơh sa kă bro pal lơh jat adat boh lam, sùm ơn bơta kuơ bơh mpồl lơh sa kă bro, cau dùl nă să dê gơ jat bal mờ bơta kuơ dà lơgar, bơta kuơ mpồl bơtiàn.