Tàm tiah Tây Nguyên, mờr 1 tơlak 400 rơbô nă kơnòm bơsram ală kấp kung hô hơng ngan tus hìu bơsram sơnđờm mut nam bơsram pa. Tàm hơ̆, càr Dăk Lăk geh 500 rơbô nă kơnòm bơsram, càr Gia Lai geh 368 rơbô nă kơnòm bơsram, càr Lâm Đồng geh 334 rơbô nă kơnòm bơsram, càr Dăk Nông geh 185 rơbô nă kơnòm bơsram mờ càr Kon Tum geh 166 rơbô nă kơnòm bơsram. Kwơ màng, cau pơgru mờ kơnòm bơsram Hìu bơsram Kấp pe Kòn cau ơm sa bĭc tơn tàm hìu bơsram càr Gia Lai chờ hờp ngan wă Củ tịc lơgar ồng Võ Văn Thưởng tus bal sơnđờm mut bơsram. Củ tịc lơgar đơs nền: “Bơh hìu bơsram kờñ gơboh do, gĭt nđờ rơbô nă kơnòm bơsram oh kòn làng bol jơi bơtiàn kòn cau Bahnar, Jarai, Thái, Nùng, Tày, Rơđê, Sơdàng... neh ntào dờng, tă pơgồp mpồl cau lơh broă jak chài drơng broă lơh bơtàu tơnguh lơh sa- mpồl bơtiàn, gàr niam lơngap lơngai dà lơgar, lơngap lơngai càr dê. Tàm khà hơ̆, uă kơnòm bơsram bơh hìu bơsram dê neh gơ gơs kwang bàng đơng lam bồ ală kấp tàm càr dê.

Di dơ̆ do, Ƀộ trưởng Ƀộ Giáo dục mờ Đào tạo ồng Nguyễn Kim Sơn neh geh dơ̆ lơh broă mờ Sở Giáo dục mờ Đào tạo càr Gia Lai. Tàm do, ồng Nguyễn Kim Sơn sồr gah bơto bơtê càr dê sền gròi gơ wèt mờ broă tam gơl pa bơto bơtê, ngan là sền gròi, lơh geh ală bơta ƀuơn nàng mpồl cau pơgru càr dê in iang nùs, pin dờn, chờ hờp tàm  broă bơto jơnau bơsram pe kấp pa dê.

Drim ngai 5/09, ồng Nguyễn Trọng Nghĩa, Kwang atbồ Ƀan Tuyên giáo Dà lơgar neh tus bal pơrjum dơ̆ ai mŭt ngui broă lơh dà sàng kloh tàm tiah cù lao Tân Phú Đông, càr Tiền Giang. Ồng Nguyễn Trọng Nghĩa neh bơto sồr kwang bàng, cau pơgru bal mờ kơnòm bơsram tàm càr Tiền Giang đơs bal mờ Hìu bơsram kấp 2 Tân Phú đơs is pal pơn jăt tai tơnguh uă broă bơto mờ bơsram, pơgồp bal tàm broă bơto kòn bơnus, bơto cau jăk ai dà lơgar in. Ală kấp ủy, gơnoar atbồ tàm càr pal git wă nùs nhơm, gùng dà bè broă bơto mờ bơsram bơh Đảng, Dà lơgar neh ai, bal mờ jơnau bơto sồr bơh Wa Hồ dê, pơn jăt tai sền gròi, ai tơl bơta niam ai broă bơto mờ bơsram in; pal pơgồp bal bơto sră mờ bơta nùs nhơm niam, bơto bơhiàn ờs mờng kờñ gơboh mờ dà lơgar.