Drim ngai 06/4, tàm Hà Nội, Mpồl kwang bàng duh broă Đảng Ƀộ Ngoại giao bơyai lơh Pơrjum Tơn jơh 10 nam lơh jat Nghị quyết Đảng dà lơgar dơ̆ 8 (khoă XI) bè “Broă rơndap lơh sền gàr dà lơgar tàm bơta pa”. Ủy viên Ƀộ Cíñ trị, Củ tịc lơgar ồng Võ Văn Thưởng, Kwang atbồ Mpồl đơng lam tơn jơh Nghị quyết neh tus bal mờ đơs đơng lam pơrjum.

Đơs đơng lam Pơrjum, Củ tịc lơgar ồng Võ Văn Thưởng sồr gah cribơyai broă mờ lơgar ndai pal sơlơ tơnguh cribơyai mờ lơgar ndai lơh sa geh cồng nha, ngan ngồn, pơgồp bơnah sơlơ tơnguh bơta pràn dà lơgar; ngui niam uă ngan rlau jơh bơta ƀuơn mờ bơta pràn pa bơh dà lơgar dê, tơnguh rlau tai gơnoar broă dà lơgar. Gah do pal pơn jat tai pơgồp bal jơh nùs mờ gah sền gàr dà lơgar, sền gàr lơngăp lơngai mờ ală kâp, ală gah broă lơh sơlơ tơnguh rlau tai broă lơh kơlôi sơnơng, kờp dŭ lài, ai tơlik broă rơndap lơh nàng lơh jat jơnau sồr sền gàr dà lơgar tàm bơta pa; Ngai sơlơ tơnguh rlau tai broă bơt bơtàu, lơh niam wơl Đảng tơl làm bè cíñ trị, bồ tơngoh, nùs nhơm; bơto pơlam, pơlam tàp kwang bàng, đảng viên in bè nùs nhơm cíñ trị, bồ tơngoh bơsram sră, pràn jak lơh jat jơnau sồr bơt bơtàu rài cribơyai broă mờ lơgar ndai Việt Nam kơ̆ kơljap, pràn kơldang, mờng chài, tơl làm, tam gơl pa.