Wă Đại sứ Ireland, Củ tịc lơgar ồng Võ Văn Thưởng nting bơr gờm chờ mò Deirdre Ni Fhallúin geh tơn pồ lơh Đại sứ tàm lơgar Việt Nam, pin dờn là mò Đại sứ geh tơngai lơh broă geh cồng nha niam bơnĕ, tă pơgồp uă ngan tàm bơta git gơp đah 2 lơgar. Củ tịc lơgar pin dờn, tàm tơngai lơh broă bơh mò Đại sứ dê rơp là tŭ tơngai lam lơh ngan ngồn ală bơta kơp kờñ tàm git gơp lơh broă bal đah 2 lơgar.

Wă Đại sứ lơgar Italia, ồng Marco Della Seta, Củ tịc lơgar ồng Võ Văn Thưởng nting bơr gờm chờ ồng Đại sứ lơh kơnòl broă pa tàm lơgar Việt Nam. Pin dờn là mờ uă mờng chài lơh broă tàm gah cribơyai broă mờ lơgar ndai, ồng Đại sứ rơp geh dùl tơngai lơh broă geh cồng nha tàm lơgar Việt Nam. Củ tịc lơgar đơs là, bơta pràn lơh broă bal 2 lơgar gam uă ngan mờ pà git, Việt Nam rơp bal mờ Italia lam lơh jat geh cồng nha ală jơnau hơ pơrgon neh kĭ. Củ tịc lơgar pà git, rơp sồr ală anih lơh broă geh gơ rềng bơh Việt Nam dê lòt bal mờ dong kờl nàng Đại sứ lơh gơs niam kơnòl broă he dê.