Tơlik nùs nhơm chờ hờp wă rò đại sứ lơgar bơdìh sơnrờp ngan tàm gơnoar broă pa, Củ tịc lơgar ồng Võ Văn Thưởng pơn jờng ală broă pơgồp bal niam bơh Đại sứ lơgar Australia dê bơh tŭ geh dờp kơnòl tàm lơgar Việt Nam mờ uă broă lơh bal mờ lơgar ndai geh kwơ, pơgồp bal tơnguh mờ lơh niam bơta git gơ̆p Lơh broă bal Jŏ jòng đah lơgar Việt Nam mờ lơgar Australia.

Củ tịc lơgar đơs niam cồng nha geh pơnrơ ngan bơh lơgar Australia dê, tàm hơ̆ uă ngan là tàm broă brồ guh wơl mờ tơnguh bơtàu lơh sa tơnơ̆ mờ kòp Kovid-19 mờ pin dờn dà lơgar Australia geh ngai sơlơ tơnguh bơtàu, geh tai uă cồng nha tàm tơngai tus. Lơgar Việt Nam ưn ngài lơgar Australia là lơgar dong kờl sơnơm vaccine uă dơ̆ bàr neh dong kờl lơgar Việt Nam geh 26 tơlăk 400 rơbô ding sơnơm vaccine rơcang sơndră mờ kòp Kovid-19, bơh tŭ hơ̆ geh pơgồp bal dong kờl lơgar Việt Nam kơrian geh kòp gơtờp, mhar brồ guh wơl mờ tơnguh bơtàu lơh sa mpồl bơtiàn.