Tàm dơ̆ wă, Củ tịc lơgar gờm chờ Đại sứ lơgar Bangladesh mò Samina Naz neh lơh sir jak ngan tơngai 6 nam lơh broă tàm lơgar Việt Nam; jờng rơ uă ală bơta tă pơgồp jơh nùs mờ geh cồng nha bơh mò Samina Naz dê tàm broă lơh jrô ơnàng làm uă rlau tai bơta gĭt gơ̆p lơh bơyô bal mờ lơh broă bal đah lơgar Việt Nam mờ Bangladesh tàm tơngai pa do.

Củ tịc lơgar pin dờn là, bulah tàm khat dùl gơnoar broă lơi, Đại sứ rơ̆p pơn jat tai lời ai ală nùs nhơm niam bơnĕ bè dà lơgar, kòn bơnus Việt Nam dê sùm là cau gơ̆p bơyô rềp mềl, sùm tă pơgồp mờ bơt bơtàu bơta gĭt gơ̆p đah Việt Nam mờ Bangladesh. Đơs là ù tiah tàm bơta gĭt gơ̆p lơh broă bal gam uă, Củ tịc lơgar sồr 2 lơgar sơlơ lơh broă bal tàm tơngai tus, ngan là tàm pơgơl mpồl kwang bàng kấp dờng lòt còp bal mờ gơ̆p mờ ală kấp nàng bơh hơ̆, sơlơ tơnguh lơh broă bal tơl làm.