Củ tịc lơgar ồng Võ Văn Thưởng kơ̆p kờñ mờ pin dờn, bŭ lah tàm gơnoar broă lơh lơi, Đại sứ geh pơn jăt tai ai ală nùs nhơm niam bơnĕ bè dà lơgar, kòn bơnus lơgar Việt Nam dê, là cau tơrbŏ bal lơh pràn kơl dang bơta git gơ̆p lơh bơyô bal ờs mờng mờ Lơh broă bal jŏ jòng đah lơgar Việt Nam mờ lơgar Tây.

Chờ gờm Đại sứ ồng Nicolas Warnery lơh gơs jăk chài kơnòl tơngai lơh broă tàm lơgar Việt Nam, Củ tịc lơgar đơs tờm, 50 nam do, bơta git gơ̆p đah lơgar Việt Nam mờ lơgar Tây neh lơh geh ală cồng nha kwơ màng ngan, tàm hơ̆ uă ngan là tàm 10 nam crơng gơs bơta git gơ̆p Lơh broă bal jŏ jòng. Lơgar Việt Nam ưn ngài broă dong kờl kwơ màng bơh lơgar Tây neh dong kờl git nđờ tơlăk ding sơnơm vaccine sơndră mờ kòp Kovid-19. Nàng tơnguh bơta git gơ̆p đah bàr lơgar tàm tơngai tus, Củ tịc lơgar sồr bàr gah pơn jăt tai lơh pràn ală dơ̆ tìp bal, cri bơyai bal, bơyai lơh geh ală dơ̆ tus còp bơh kwang đơng lam kấp dờng. Bơh Đại sứ, Củ tịc lơgar pơyoa jơnau jà mờ yal lơgar Việt Nam tŭ lơi kung rơcang wă Kwang atbồ lơgar Tây ồng Emmanuel Macron tus còp lơgar Việt Nam tàm tơngai di pal.