Mho òr (22/08), tàm Gơlang Củ tịc, Củ tịc lơgar ồng Võ Văn Thưởng wă mò Viengthong Siphandon, Ƀí thư Đảng Làng bol Kăc màng lơgar Lào, Kwang atbồ Anih cah rơña làng bol dờng rơlao jơh lơgar Lào gam geh dơ̆ tus còp mờ lơh broă tàm lơgar Việt Nam.

Củ tịc lơgar ồng Võ Văn Thưởng chờ gờm mò Viengthong Siphandon bal mờ Mpồl kwang bàng Anih cah rơña làng bol dờng rơlao jơh lơgar Lào tus còp, lơh broă mờ Anih cah rơña làng bol dờng rơlao jơh lơgar Việt Nam; pin dờn dơ̆ tus còp geh tơnguh bơta đềt mềr rơlao tai bơta git gơ̆p lơh broă bal đah bàr Anih cah rơña bàr lơgar; mờ pơgồp bal tàm broă bơ̆t bơtàu bơta git gơ̆p lơh bơyô bal kwơ màng, tam klăc bal, lơh broă bal tơl ală bơta đah lơgar Việt Nam mờ lơgar Lào. Yal jơnau mờ Củ tịc lơgar bè cồng nha cri bơyai mờ Kwang atbồ Anih cah rơña làng bol dờng rơlao jơh lơgar Việt Nam ồng Nguyễn Hoà Bình, mò Viengthong Siphandon pà git, bàr gah neh cri bơyai ală tơngu me, gùng dà broă lơh bal; ring bal pơn jăt tai tơnguh, tơrbŏ cồng nha bơh “Nam tam klăc lơh bơyô bal đah lơgar Việt Nam mờ lơgar Lào, lơgar Lào mờ lơgar Việt Nam”. Bàr gah kung ring bal pơn jăt tai tơnguh bơhiàn niam bơnĕ bơh bơta git gơ̆p bal kwơ màng đah lơgar Việt Nam mờ lơgar Lào mờ ală rơnàng kwang đơng lam bàr lơgar neh ai uă ngan tơngai bơ̆t bơtàu.